Josef en die Duif
Hy sit soos gewoonlik eenkant en alleen, weg van die bykans kinderlike opgewektheid van sy mede verkoopman kollegas wat mekaar ´n jaar laas gesien het. Professionele smouse, Reps wat hulle jaarlikse verkoopskonferensie in ´n deftige vyfster hotel op ´n eksklusiewe landgoed bywoon.
Hy sit en teug aan ‘n groot glas donker bier, dog ek. Dit is toe nie, dit is herbale tee, donker, bitter tee, vind ek uit. Ek stap oor en steek my hand na hom toe uit en sê “Josef”. Hy kyk op, bly sit, vat my hand en sê “Mouton”. Ek knik my kop in die rigting van die leë stoel oorkant hom. Hy knik sy kop instemmned sonder om ´n woord te sê.
“Bier?” vra ek en wys na sy drinkgoed. “Tee,” sê hy saaklik. Ek gaan sit en bestel vir my ´n glas bier, donker moutbierwat amper lyk soos sy tee, sodat ons op gelyke voet in gesprek kan tree. Hy is gesteld op besonderhede. Wat vreemd is, is dat hy gewoonlik ook Milk Stout bier drink. Ek wonder oor die tee, maar vra nie.
Hy is ´n fyn besnaarde mens, wat my altyd laat wonder hoe hy in die smous bedryf beland het. Wat nog meer wonderbaarlik is, is dat hy dit so lank in die ongenaakbare wêreld van verkoopsyfer druk en winsbejag kon uithou.
Hy het voorheen my raad kom vra oor ´n vreemde kompulsie wat hy het. As hy ´n boks vuurhoutjies in die hande kry, het hy vertel, trek hy die vuurhoutjies een vir een aan die brand en hy hou nie op voor die boks leeg is nie. Net dit, onkeerbaar; trek die vuurhoutjie dat dit brand, kyk asof gehipnotiseerd na die vlam tot dit amper sy vinger brand, laat dit val en steek die volgende een aan. Obsessief-kompusief een vir een tot die boks leeg is. Wat, wou hy weet, is verkeerd met my kop?
Nou sit ons hier en drink in stilte. “Hulle roep ons daar oorkant,” sê hy. “Seker vir die verwelkoming by die sirkus.” Ons staan op en loop na waar die ander verkoopsmanne voor ´n deur saamdrom.
“Ek wil jou vertel van ´n duif langs die pad,” sê hy terwyl ons aanstap. “Ek sal vannaand na ons verdaag het vir jou wag, daar oorkant op die stoep voor die restaurant, beduie hy. “´n Tortelduif,” voeg hy by voor ons aansluit by die uitbundige lot mans, die verkopers van uitmuntende produkte aan grootliks onkundige, verwarde kopers. (meer…)
SkalkSkryf 