`n Baie Kort Besoek (uit die hel)
Die Tante laat weet uit die bloute sy kom oorstaan vir `n paar dae, sy moet hospitaal toe vir haar pille en salwe by die staatshospitaal. Sy het mos “`n hart” jy weet?
Almal weet sy kom al baie jare elke drie maande vir die besoek ‘sodat die dokter oor haar kan gaan’. Maar dit is die eerste keer dat sy by haar onlangs oorlede suster se enigste dogter wil kom oorstaan. Iets is nie heeltemal pluis nie, vermoed ons. Daar is motiewe, duister motiewe betrokke.
Laat Donderdag laai haar seun haar voor die deur af en ry weg. Later het ons vermoed sy het met haar eie besemstok aangekom. `n Paar dae van hel het stilweg aangebreek.
Dis laat en `n keurig voorbereide aandete word vir Tante voorgesit. Hoeder, groente, slaai en vrugtesap. Tante dring aan op Whiskey, sy drink nie sappe nie. Sonder om te blik of te bloos stoot sy die bord aangebode kos weg. Sy eet nie hoender met vel aan nie. Suster se kind bied aan om die hoender se vel vir Tante te verwyder, maar dit is steeds nie goed genoeg nie, die vel moes verwyder gewees het nog voordat die hoender gaargemaak is. Sy sal dit nie eet nie, en sy kan ruik daar is knoffel in die kos. Sy eet nie knoffel nie, sy is allergies daarvoor.
Oorlede Suster se kind gaan braai gedienstig vir Tante tjops (sonder vet) en tjips en maak `n nuwe slaai. Dit was maar net die begin.
Ses uur die volgende oggend laai my vrou vir Tante op en vat haar hospitaal toe. Dis meer as `n uur se ry daarheen. Op pad sê Tante sy moet na haar seun toe wat so tien kilometers van die hospitaal af bly. My vrou sê daar is nie tyd nie, sy moet terug werk toe. Tante bars in trane uit. Sy moet vir haar kind gaan kos koop. Die kind het sy werk verloor, hy het nie geld nie, hy het nie kos nie, hy gaan uit sy woonstel geskop word. Snot en trane. Ek het my vrou gewaarsku teen die snot en trane aanslag. Staan vas, het ek gesê.
Goed, sê my vrou die Samaritaan. Ons sal gou daar `n draai maak as jy klaar is by die hospitaal.
Tante word by die hospitaal afgelaai, vroulief ry na `n winkelsentrum vir `n koppie koffie vir versterking.
Die hospitaalbesoek word redelik vinnig afgehandel. Seun word opgelaai sodat Ma vir hom kos kan gaan koop, op rekening by Pepstores. Dit draai uit, Peps verkoop nie kos op rekening nie en Tante het nie geld nie, sal Vroulief nie maar vir Seun `n paar goedjies koop nie?
Seun kry tenminste so half skaam. Ma pak die trollie. Seun vat klein verpakkings kos, maar sy ma stuur hom elke keer terug om die groot pak te vat, jou tannie gaan betaal, vermaan sy hom! Vroulief ruil die groot pakke verbete weer om vir die klein pakke om die skade op ons begroting te beperk.
Sy gaan laai Tante weer af by Oorlede Suster se dogter. Tante het nie haar voorskrifmedisyne (wat sy gratis by die hospitaal kon kry) gaan haal nie, dus moet sy apteek toe gevat word. Tante het steeds nie geld nie en die kardoes pille kos ons niggie uiteindelik `n duisend rand.
Niggie gaan gou by die Spar in vir `n paar goedjies vir die huis en Tante gaan saam en Tante koop links en regs want, “ek is so lus vir dit en kan ek maar van die ook kry, en hierdie lyk so lekker.” `n paar honderd Rand en `n bottel Whiskey later vlug Niggie terug huis toe met die demon Tante dikbek op tou. Sy wou nog baie shop.
“Ek sien jy het twee van jou ma se stoele uit haar woonstel hier by jou,” sê Tante toe hulle by die huis kom. “Jy het hulle nie nodig nie, ek wil dit hê. Daai BMW van jou ma staan net daar, julle het dit ook nie nodig nie. My seun het nie `n kar nie, jy kan dit vir hom gee sodat hy kan gaan werk soek. En ek soek jou ma se selfoon.” Sommer so, sonder asseblief of opgaaf van rede. Susterskind kners op haar tande en gaan gooi vir tante `n dop en vir haarself `n dubbel.
Later in die dag, na die hoeveelste dop Whiskey sê Tante sy wil na haar Oorlede Suster se woonstel toe gaan, om te gaan afskeid neem.
Niggie lieg en sê sy het nie die sleutel vir die woonstel nie. Tante sê dan sal sy sommer in die tuin staan en groet, en sy draai die traanfabriek oop. Niggie hou haar siende-doof. In Niggie se are vloei dieselfde bloed, hardegat bloed, sy sal nie ingee nie.
“Jou ma het kaste vol klere en skoene gehad,” sê Tante nou traanloos aggressief. “Ek soek daai klere en skoene. Jy kan tog niks met dit doen nie.”
En dit is dan die rede waarom sy die woonstel wil besoek, nie om te groet nie, maar om te aas. Oorlede Suster was `n klein en fyn mensie, het skaars 50 Kg geweeg en het `n nommer 4 skoen gedra. Tante weeg `n stewige 80+ kg en is ten minste nommer 8 bepoot.
Niggie ignoreer die verbale aanslag en gooi nog dop vir die nou dikbek tante.
Vier uur die nag loop Tante in die huis rond, sit ligte aan en maak kaste se deure oop en slaan dit hard toe. Die babas word wakker en begin huil, almal in die huis staan op om die orde te probeer herstel. Tante maak vir haar tee en gaan klim weer dood luiters in die bed.
Laat die Sondag oggend staan sy op en kla dat sy so `n slegte nag gehad het, die kinders se gehuil het haar erg gepla. Kan julle nie die kinders beheer nie, blaf sy. Met `n glas Whiskey in die hand vra sy of hulle dan nie in die winkelsentrum kan gaan rondloop nie. Net om te kyk!
Sonder seremonie boender Niggie die Tante in die kar en vat haar terug na haar werklose seun toe. Genoeg is genoeg.
`n Bestekopname toon later; een vermiste Bybel en gesangeboek van Oorlede Suster, tesame met 30 CD’s en `n bottel Whiskey wat spoorloos verdwyn het.
Deel hierie met jou maters
Read Full Post »